khaled Juma
سجل الزوار   راسلني   الصفحة الرئيسية
   
 
 
  قصائد
  قصص
  مسرح
  translation
  أبحاث ودراسات
  أعمال آخرين
  مواقع أدبية
  متفرقات
  صور
   
 
أغاني أطفال
أغاني للأطفال

شفتي يا إمي

لحن: جمال النجار

شفتي يا إمي مش قلتللك
درس الإملا حفظتو صم
والأنتي وعدتني بنجمة
ليش النجمة عليها دم
يا إمي حاسس بردان
حاسس لاحقاني الغربان
بهرب مش لاقي حيطان

وين كتابي
وين صحابي
ليش الأبيض لبستوني
مين اللي غمضلي عيوني
ووين رحتو وتركتوني

خليني أرجع لحضنك
وانا بحلفلك
رايح أسمع شو ما تقولي
ما راح كسر لعب اخواني
رح آكل وافرشي سناني
رايح أقرا ورايح أهدا
بترجاكي خديني معاكي

عتمةوخايف يمة كتير
يمة دخيلك إضوي النور

ـــــــــــــــــــ

في بيتنا عصفور جناحه ذهب
أراه حين يبكي لا أعرف السبب

وصاحبي الصغير يعيش في قفص
آتيه بالطعام أحكي له القصص
لكنه ينام  بالجوع والتعب

ومرة تركته  ذهبت للعب
رأيت طيراً مثله  جناحه ذهب
عن صاحبي سألته  في بيته الخشب

فقال لي وصوته  يبدو به الغضب
إننا طيور  تحب أن تطير
وفي الفضا نغني  وننشر الطرب
وطيرك الصغير  يشكو من التعب
ولا يحب سجنه  لو كان من ذهب
ــــــــــــــــــــــــــــــــــــــــــــ

لحن محمود العبادي

جوات الجنينة المليانة شجر
جدتي امينة بتتفرج عالقمر

ياستي شو بتسوي
تحت القمر المضوي

قالت بقطّف نجمات
وبخبيهن للبنات

وكيف طلعتي وعليتي
واكم نجمة لميتي

لميتلك سبع نجوم
كل نجمة تضويلك يوم

ديري بالك للقمر
بيدور بين الشجر
كنو استعوق خواتو
عندو الليلة ما باتو

وهو شو بدو مني
وين ما اروح بيلحقني
ولما اغطي عينية
بيمرق من بين ايدية

وجهك زادت حلاتو
بيحسابك من خواتو
ــــــــــــــــــــــــــــــــــــــــــــ

ياعم وريني الطريق
قدامك حجر وابريق
والابريق مكسر
وصاحبتو بتتحسر
عللي راح وما اجاش
وضيع طيناتو بلاش
والبلاش كتر منو
والمواس بينسنو
واللي سننهن حاوي
ملا جرابو بلاوي
بلاوي كل الالوان
ومربي في دارو سعدان
شعرو اسود ومخطط
خط ملولو ومخربط
وملولو يعني حية
بتوكل البيضة نية
والبيضة فيها كتكوت
والكتكوت بدو أمو
والدمعة بلت كمو
ودموعو حب العزيز
والعزيز طق ومات
مابدو خلفة بنات
والبنات مكتفات
والقيد عيون الباشا
والباشا قابض عالمال
والمال بيحرس سيدو
تتظل طويلة ايدو
ايدو يا فرش السلطان
اللي داير عالنسوان
والنسوان بدواير
والدواير مكتوبة
والحنية مغلوبة
غالبها عسكر قاسي
محتلين الكراسي
والكراسي مكسرة
والابواب مسكرة
سكرتها ريح الشوم
ولما غراب البين يحوم
يوقع سور المضافة
وتذبل عيون السلطان
وتطلع وردة هان وهان
 

ــــــــــــــــــــــــــــــــــــــــــــ

لحن جميل السايح

فتحت كتاب الحساب            كان في طوشة ف أول بـاب
الواحد ماسك في السبعة       والخمسة بتضرب في التسعة
والباقي ماسك في بعضو      هذا بشدو وهذا بعضو
كان الواحد صوتو عالي       قال انا واحد لحالي
كل الدنيا بتبدا فيّ             وما بييجي جدا بدالي
نط التنين وقالو إسمع         ما بتقدر توقف ع قبالي
حتى لو ضربوني فيك         مش راح تتغير أحوالي
والخمسة دخلت ع الصورة     ضربتهاالستة بطبشورة
أما التمنية المغرورة           ضحكت وأكلت أربعتين
والتلاته هيها انكسرت         والسبعة ع التسعة هجمت
والأرقام بصفحة التمت         مانا عارف خمسة من تنين 
دخل الصفر وكان يصفر        كلو نقطة بس بيقدر
يضرب كل ارقام الدنيــا      ويخليها صفر مــدور
قالهم اهدو يا أرقام             كل واحد منكم شو بدو
لو يوقف محلو تمـام          بتطلع نتيجة على قدو
كل واحد منكم بيساعد          تيزبط صفحة الكتاب
ولو يرحل منكو ولو واحد      راح يتخربط كل الحساب .

ــــــــــــــــــــــــــــــــــــــــــــ

لحن سهيل خوري

ليل الدنيا قمرها كبير
ونجوم تلفلف حواليه
كان نفسي لو بعرف اطير
وانزل أتفرج عليه

بس مبارح شفت كتاب
جواتو مرسومة قمار
صخرو مبين زي الانياب
ولا فيه ميه ولا أشجار

كنت اتصور قمري يكون
مليان ورود وازهار
وانو في ناس ومسكون
وبتجري فوقو الأنهار

أرضي حلوة وفيها الخير
وفيها بلاقي أهل ودار
منيح اللي ما بعرف اطير
ما بدي أسكن في قمار

ــــــــــــــــــــــــــــــــــــــــــــ

نفسي أطير طيارة         وخايف من كانون
الدنيا بتشتي بالجارة      والشتا مجنون
القمر ما بينشاف          بالغيمة مدفون

نفسي تعلا فوق الريح          ترقص مع هباتو
تزور القمر ال فوق الغيم       وتحكيلي حكاياتو
ترجعلي بأخبار                  وما تخبي اسرار
وتقوللي القمر شو بدو          تيرجع ع الدار

بكرة بيجينا نيسـان            ولما الشمس تزورو
بعمل طيارة بخيطان             وبلعب بين زهورو
ويا طيارة طيري                جيبي نجمة زغيرة
جيبي لون وجيبي زهور       وجيبي غنوة ونور
والقمر ينشاف   ويغني الحسون

ــــــــــــــــــــــــــــــــــــــــــــ

تاتا خطي العتبة          تاتا خطــوة خطـــوة
تاتا حبْ اللولو            يضحك للبنت الحلوة

تاتا في قلبي خشي       ع وراق الورد اتمشي
تاتا يا بلسم نــور      فوق جراحي بترشي
 
تاتا وسنتك ع الباب       وتغنيلك شمس العيد
ويهللك صوت الناي        يدعي لعمرك تيزيد

تاتا ضمة ياسمـــين    ترسم ضحكة للحلوين
بتمنالك صبح وليل         ربي يحمي هالعينتــــين .

ــــــــــــــــــــــــــــــــــــــــــــ

لحن عودة الترجمان

جينا ع الدنيا جينا           معنا أحلام واحلام
والدنيا راح تعطينا          حب واصحاب وسلام

احنا عصافير الأشجار       مثل النوار بنسيـان
نزعل يبكي معنا الورد      نفرح بتزيد الألوان

خلونا نفتح ونعيش          زي البستان وأزهار
لحسن لو يزعل نيسان      بيبطل يبعث نوارو..
ــــــــــــــــــــــــــــــــــــــــــــ
لحن سهيل خوري

الامتحان

بكرة في عندي امتحان           وما فتحت كتابي
كنت انا وابن الجيران            بالعب مع أصحابي
أبوي مني زعلان
امي قالت يا كسلان
آه ياراسي أه ياراسي
من كتاب الحسابِ

أرقام بتلحق أرقام  أجمع واطرح فيها
الاستاز بيحكي كلام ويأكد عليها
حكيو مش جوة الكتاب
كنّك يا كتابي كزّاب
آه ياراسي آه ياراسي
من استاز الحسابِ

سكّرت كتابي ع طول بعد الدرس الرابع
من برة مكتوب عليه كتاب الصف السابع
طلع كتاب اختي ياسمين
أكبر مني بتَلْت سنين
آه يا أختي مايل بختي
مع درس الحسابِ

ــــــــــــــــــــــــــــــــــــــــــــ
لحن سهيل خوري

الجاجة باضت بيضة

جاجتنا باضت بيضة            حلوة مدورة وبيضة
وما بصدق لو بموت            إنو جواها كتكوت
بس الكتكوت الأصفر           طالع منها بيتمختر
لابس بدلة فيها ريش          وبيجري فوق الحشيش
والحشيش معبا مي   
بلّّل فيها جناحاتو              وزعلن منو خواتو
خواتو ديوك وجاجات         طلعو زيو من البيضات
وهو كمّل مشوارو            ولقّّط حبّ بمنقارو
لكن كتكوتي زعلان          بدو يطلعلو جنحان
زي جناحات الدوري          ياماما ليش ما تطيري
ضحّك أمو سؤالو             يا ماما ما عنا عشوش
إحنا بنسكن بين الناس       بنوكل الحب المرشوش
ولو مرة جاجة طارت         وباضت والبيضة خداج
كان اتكسر فوق الأرض      وما بيعود يفقّس جاج
ــــــــــــــــــــــــــــــــــــــــــــ
لجن سهيل خوري
 
قوس قزح

كم أعشقُ الألوان           في قوس القزحْ
إذا أتى الشتاء              تطلُّ بالفرحْ

في القوسِ لا يميل          لونٌ عن المكانْ
والأحمرُ الجميل             شقائقُ النعمانْ

من بعدِهِ يجيء             اللونُ البرتقالْ
فالأصفرُ الجريء           كالموز والتلالْ

 والكحليُّ الحزين          ينامُ في أمانْ
من تحتِهِ البنفسج          في آخرِ الألوان

لو أنني هواءْ            وفي السما مكاني
يناديني الفضاء:         يا ثامنَ الألوانِ

ــــــــــــــــــــــــــــــــــــــــــــ

لحن سهيل خوري

توب ستي

ستي إلها توب وشال          عالتوب مطرّز غزال
جنبو ورود وسنابل            من حواليها سبع جبال

ياستي توبِك محلاه             تسلم إيد اللي سواه
قالت طرزتو بيدي              في كرمتنا البعيدة

طرزتو غرزة غرزة           ولبستو ليلة عرسي
هذي الغرزة من يافا           وهذي الغرزة من غزة

والشال اللي ع كتافي         حريرو برضو صافي
لو ياستي أحكيلك             طول العمر مش كافي

وعرفِت ياستي ليش          شالِك عليكي غالي
وصارو شالك مع توبِك       أغلى عليّة من حالي
 
ــــــــــــــــــــــــــــــــــــــــــــ

سن اللولو

يا ماما سني انكسرت         شو بدي أعمل فيها
قالت لي في عين الشمس    غمض عينك وارميها

واطلب منها تعطيلك          بدالو حبة لولو
لما بتضحك بيضوّي         والنجمات يغنولو

ياشموسة يا بعيدة           خذي سني ع جفونِك
قبل ما تروحي اعطيني     سن مدوّر من لونِك

كم مرة اعد سناني          طلع الصبح وانا سارح
والسما ملاّها الغيم          وما طلّت شمس مبارح

ما بدي سن اللولي          ولا نجوم يغنولي
يا شموسة تعالي            مع سني الأولاني
ــــــــــــــــــــــــــــــــــــــــــــ

لجن سهيل خوري
لغتي

لُغتي لغتي ما أجملُها؟  ألِفٌ باءٌ هي أوّلُها

لو لم توجد عندي لغةٌ
كيف سأحكي عن ألعابي؟
كيف سأقرأُ كلَّ القصصِ
كيف سأفهمُ درسَ الحصصِ

انتبهوا للضادِ انتبهوا
كي يبقى في لغةِ العربِ
فهو يتيمٌ لا يشبههُ
حرفٌ في كلمات الكتبِ

لغتي لغتي ما أجملُها؟
واوٌ ياءٌ هي آخرها.

ــــــــــــــــــــــــــــــــــــــــــــ
تلاوين تلاوين تلاوين تلاوين تلاوين تلاوين تلاوين
ارض وناس وزرع ومية وشموسة وبساتين
أزرق أحمر بني أصفر غزلان وحساسين
لو تطّلع تلقى العالم عشمال ويمين
تلاوين تلاوين تلاوين تلاوين تلاوين تلاوين تلاوين

يا قوسي محلا الوانك
نرقص ونغني عشانك
بالشتا بتيجينا ضيف
وترحل لما بييجي الصيف
وبتتركنا يا مسكين
نستنى من غير تلاوين
تلاوين تلاوين تلاوين تلاوين تلاوين تلاوين تلاوين

رتبنالك بيت جديد
ومخبى جواتو عيد
وألوانك تكتر شوية
من الكرمة وايد الجنية
ويمرو جنبك السنين
وتضل معبى تلاوين
تلاوين تلاوين تلاوين تلاوين تلاوين تلاوين تلاوين
ــــــــــــــــــــــــــــــــــــــــــــ

أنا كبير
أنا زغير
على كيفي بزغر وبكبر
وعلى كيفي أهدي واطير

لما يقولو حط وشيل
ساعتها بصير زغير
ولما بدي اسهر في الليل
بتغير واصير كبير
أنا كبير
أنا زغير
على كيفي باهدي واطير

في ايدي خاتم مع جني
لوين ما بدي بيحملني
بدخل جوات الكلام
واطلِع من تل الأحلام
ورد وزرع ومية كتير
وشو ما بدي فيها بصير
مرة غيمة ومرة أمير
مش قلتلكو اني زغير
مش قلتلكو اني كبير
على كيفي باهدي واطير