khaled Juma
سجل الزوار   راسلني   الصفحة الرئيسية
   
 
 
  قصائد
  قصص
  مسرح
  translation
  أبحاث ودراسات
  أعمال آخرين
  مواقع أدبية
  متفرقات
  صور
   
 
أغاني
أغاني

عمّ جبارة ولاده احدعش
غرفة زغيرة وفش فراش

عم جبارة مخه مخشب 
 قايم قاعد برضو بسبسب
واللي بيقوللو بكرة بتحلا 
ما تشوفو الا ولحقو بشبشب

عم جبارة نفسو في دولة
قال يصبح فيها رئيس
بدو يهجّر عيلة مرتو
وييفتّح كل الكواليس
بدو يكسّر سوق البسطة
ويلغي البيجو من السرفيس

عم جبارة لسه بيحلم
غازل حلمو ع الصنارة
أي وينك يا عم جبارة
ها الدنيا شهقة سيجارة
وعمرك كلو حلمة وضاعت   
ما ضيعها إلا ابليس
ولقمة تنشف بلا تغميس

عم جبارة ولادو احدعش
عم جبارة بيكره حالو..
وكل ارقام ال فيها احدعش ..
ــــــــــــــــــــــــــــــ

عَ حَدِّ السّيْفْ
تْقَصْقَصْ يا حِلِمْ وانْشَقّْ
عَ بُرْدَايِة بِتْهَفْهِفْ على شِبّاكْ
ما بيِفْتَحْ على فَضَا
لازمانو جاي ولا هو مضى
وبْعيدْ في آخِرِ الشّوفْ
خَيَال صبية ومَيّة وناي
تُفْرُكْ سنابل سَبَلْ وتعبّي جدايلها
نِجمةْ بس مين اللي طايلها
ما بين حلم وِرْصَاصْ
وِقِعْ قلبي على حِفّةْ وَطَنْ
مْغَمّس وَساوِسْ ملضومة بْليلْ
وانا قلبي لا هو فارس
ولا علّمتو يِسْرِجْ خيل
امي حورية مَيّ طالعة من قِصّة
وابوي شْراع بالريح يتوصّى
خْواتي غيمات الشتا المحملة غناوي
لا طْلِعِتْ مَلِكْ، ولا كُنِتْ ناوي
استقرَضو جلدي تيحسو الشتا
بس قلبي وقع على حفة وطن
يمكن وطن
أو يمكن لعبةْ رَمِلْ عالشط
يدوبك خط
لَطَشْها الموج على سهوة
مع مَرْقِتْ بِنِتْ حلوة
وسَكّرْ خَطْوِتُو العاشق
ومط الليل ذراعاتو
وأجا صيف ورا صيفين
وغيمات الشتا ماتو
ــــــــــــــــــــــــــــــ

نامي يا عيني والنوم ما يرضى
لو تلاقيني والصبح فضة
والعمر دينة بالنوح يتقضى

سيدي يا طه
بخطوتك جودي
بوّس وطاها
يا ندى ورودي
رفرفت روحي
بالوسن مرت
برّت جروحي
شجيرتي اخضرت
يا حامي داري
ليلة البرق
طفيت ناري
وانبرد حرقي
ناجيت رسمك وانعدل بختي

سيدي ياطه
والفرس برقة
ربي عطاها
محبتك خلقة
من فوق سبعة
شافَتك عيني
حلَّت الدمعة
والدمع دينة
شاهدت نورك
ليلة القدر
يومن حضورك
اكتمل بدري
بجاه إسمك تنظر بحالي

كأني من عشقك دوماً على سفر
والقلب مشدود قوساً على وتر
إرحم عروقاً قد امتلأت بسيدها
بجاه من أسرى بك في لمحة البصر

ــــــــــــــــــــــــــــــ
 
يحملني الليل
ونجم سْهيل
ومتغرّب ومِش راجعْ
واشوف في النار
سما وِقْمار
ونور من الوجع طالع
يحملني الليل

وطني في الخلا الخالي
وحالي ما دِري بحالي
وانادي سْراجَك العالي
يلاقيني الصدى راجع
في عز الليل
يحملني الليل

يا سر الكون يا متخبي في دقة طار
يا نقطة طَلّْ على قلبي وحِلِم دوّار
روحي للفضا مراية
واعبّي الدنيا جواية
يحضنّي المدى الواسع
واضمّ الليل
يحملني الليل

عباية نور على كتافي
ودُعايي باب
ونجمي معلَّق وغافي
في قلب كتاب
أروح وآجي
ورا سراجي
أسبّح والجِفِنْ دامع
يبلّ الليل
يحملني الليل

ــــــــــــــــــــــــــــــ

صباح البلابل

صباح البلابل
على الأصايل
على روح بتعشق النور
وتغني للسنابل
بتحب الندى عريش العصفور
وتكره تشوف الحرس والسور

صباح البُحور
تهفهف على الدور
تنعس ع صهيل المي
تغزل من حر الشمس في
وتقوللك بحبك يا بلد
ولو طال الوقت
برضو جاي

صباح النرجس أبو الأسرار
يرش النسايم ع حيطان الدار
انا قلبي انسرق
ورجع انخلق
لما في صبحك
رفرف الوروار
 
ــــــــــــــــــــــــــــــ

عروستي يا ام الجدايل حرير
مين بيلعب معاكي
مين بينيمك جنبو عالسرير
ويحطك عشباكو
تتسمعي العصافير
عروستي ياام الجدايل حرير

يمكن صوتي بيسليكي
لمن بيغني حواليكي
اشتقتلك لما تشوفيني
تجري وفاتحالي ايديكي

يا عيني يا دمعة عيني
بعاد بعاد بعاد بعاد
بيني وبينك سما وبلاد
وبرضو بتيجي وبتضميني

عروستي يا ام الجدايل حرير
مين بيلعب معاكي
ومين  
بيحطك ع شباكي؟؟
 
ــــــــــــــــــــــــــــــ

نيّمتِكْ في العِلّيّة
خوفي عليكي مْنِ الحَيّة
نيّمتِكْ ما نيّمتِكْ
وصوت الدّوْري علَّمْتِك
عَلَّمْتِك سرِّ الشَّمْسةْ
تِضْوي  قلبِكْ مِنْ لَمْسِةْ
لَمْسِةْ وْهَمْسِةْ بَشَّاشةْ
على جْناحات  الفراشةْ
نيّمتِكْ في العِلّيّة
نيّمتِكْ في عينيّة
 
ــــــــــــــــــــــــــــــ

يا بحر
يابو الموج اللي ما بيتعب
شايف أحزاني وأفراحي
من ليلي فصّلت جناحي
يا بحري بالله لا تعتب
ماهو بإيدي أهدي مواجك
ولا اعبي زيتي بسراجك
ما بيدي إلا اغنيلك
ولما تناديني ألبيلك
يابحر يابو الموج اللي ما بيتعب
ــــــــــــــــــــــــــــــ
 
صَباحِ بْلادي وبلادَكْ
فَرَحْ عَصْفورْ بِيْغَنّي
زوّقْ رُوْحَك وْزادَكْ
قَلاَيِدْ نورْ مِتْحَنّي
شَهْقِةْ ناي بِنَعّسنا
رَسَايِلْ من مَوَارِِسْنا
صَباحِ بْلادي وبلادَكْ

قَطَفْتِلّكْ حِلِمْ راسي
وْوِِسْواسي
ودفّيتو
وودّيتو
بْصُوتِ بْعيدْ غَطّيتو
وأَعطيتو
كَلاَمِ عْيون عَتْبانِةْ
عَتَبْ بَحّارْ على شَطّو
عتب مَكْتُوبْ على خَطّو

خوفي عالنّدى يِنْشَفْ
عن المَعْنى
يِبْعِدْ ما يْوَدّعنا
مَا يِحْكي وما يِسْمَعْنَا
ويوجّعنا
مدى ليلٍ أخد صوتو
خفى صوتٍ قصد  بيتو
إوْصل صوتي تيضلّو  
شَهْقِةْ ناي بِنَعّسنا
رَسَايِلْ من مَوَارِِسْنا
صَباحِ بْلادي وبلادَكْ

ــــــــــــــــــــــــــــــ

غنوة ع شفاف الحادي
 صوت بلادي
أهل وسهل وبوادي
 وردة وبدور

الطير العالي سارح
 صوتو صادح
قاصد أرض الملايح
 من سبع بحور

بكرج قاعد ع حيلو
 ناطر هيلو
قهوة نار تغنيلو
 داير ما يدور

والبحَر ضحكو شطوطو
 ورسْم خطوطو
والقمر مدّ خيوطو
 ما بين الدور

والصبايا في السامر
 عالبيادر
سبحانو ربي القادر
 صوّر هالنور

فَكْفِكْ طوق الغزالة
 يا ابن خالي
يرقص ريح الشمالي
 ما يهمّو سور

يضحك لون السنابل
 للمناجل
والشجر عالي وحامل
 عش العصفور
ــــــــــــــــــــــــــــــ
 
ميل زهرو وبوّس كفي
عودك يا سجرات الحنة
قالو مين الزين اللي يوفي
قلتلهم هالفارس من عنا

دمعك يا ستي
حجارة وبتشتي
وانهزمت جيوش
وعمرك ما خفتي
وعمرك ماتموتي حتى لو متّي

في عب الشمس
خبينا القدس
والتمو الفرسان
وحجلت الفرس
ومن باب العمود حنة للعرس 

فوق حجار السور
عشش العصفور 
ريشاتو فرح
وجناحاتو نور 
وتغنيلو الدور ويغني للدور

والبحر مرايات
والشجر نايات 
والقمر سبيل
والليل حكايات 
والندى ناطور ع حلم البنات
 
ــــــــــــــــــــــــــــــ
 
راشيل

صباح الدّور
يا بنت النور
يا حبة ندى ع ريشة عصفور
عصفورها يا ابن حارتها
لقِّط من فوق شفِّتها
غنوة ومين يسكِّتها
طارت كشفت المستور
صباح الدور
يا بنت النور

على عيونك كلم وندى
والنرجس لمَّنو بدا
يا بيت بعيد
يا قلب قريب
شَفِّ الناي على سنّك
كأنو من الدفا إبنك
كأنو النور
غسل البحور
ونيَّم نجمو في حضنك
ولملم ضلعك المكسور
صباح الدور
يا بنت النور
صباح مسحور
ــــــــــــــــــــــــــــــ

ياللي الحرير يجرحك
واشحال ملبوسك
احذر يدنق عليك
النذل ويبوسك

والناي من شفّتك
غارو مواويلو
والهوا شال غرتك
بيّن قمر ليلو

تتنهد من حر العشق
يسري تمر حنة
أكلت اقدامي الطرق
والخطوة منجنة

ياللي الحرير يجرحك
واشحال تجرحني
حلفت ما أذبحك
لو دوم تذبحني
ــــــــــــــــــــــــــــــ